ગુજરાતમાં વરસાદનો નવો રાઉન્ડ: ૩ સિસ્ટમ સક્રિય થતાં આગામી ૨ દિવસ આ જિલ્લાઓમાં ભારેથી અતિભારે વરસાદની ચેતવણી

રાજ્યના હવામાન વિભાગે ફરી એકવાર વરસાદ અંગે નવીનતમ આગાહી જારી કરી છે. હવામાન વિભાગે આગામી બે દિવસ માટે રાજ્ય માટે મહત્વપૂર્ણ હવામાન અપડેટ જારી કર્યું છે. 8 અને 9 ઓગસ્ટ દરમિયાન રાજ્યના ઘણા વિસ્તારોમાં ગાજવીજ સાથે હળવાથી મધ્યમ વરસાદની આગાહી કરવામાં આવી છે જેમાં મોનસુન ટ્રફ અને વેસ્ટર્ન ડિસ્ટર્બન્સ સહિત કુલ ત્રણ સિસ્ટમ સક્રિય થઈ છે. ભારે વરસાદની શક્યતાને ધ્યાનમાં રાખીને ઉત્તર ગુજરાતના કેટલાક જિલ્લાઓમાં યલો એલર્ટ પણ જારી કરવામાં આવ્યું છે. માછીમારોને દરિયામાં ન જવાની પણ સલાહ આપવામાં આવી છે.

ત્રણ સિસ્ટમ સક્રિય થતાં વરસાદી વાતાવરણ રહેશે

હવામાન વિભાગના જણાવ્યા અનુસાર, મોનસુન ટ્રફ, વેસ્ટર્ન ડિસ્ટર્બન્સ અને અન્ય એક સક્રિય હવામાન સિસ્ટમના પ્રભાવથી રાજ્યમાં વરસાદી વાતાવરણ સર્જાયું છે. આને કારણે 8 અને 9 ઓગસ્ટના રોજ ઘણા વિસ્તારોમાં વાદળછાયું વાતાવરણ, વીજળી અને પવન સાથે હળવો થી મધ્યમ વરસાદ પડી શકે છે. કેટલાક વિસ્તારોમાં સામાન્ય વરસાદની શક્યતા પણ વ્યક્ત કરવામાં આવી છે.

ઉત્તર ગુજરાતના જિલ્લાઓમાં યલો એલર્ટ

8 ઓગસ્ટના રોજ: સાબરકાંઠા અને અરવલ્લી જિલ્લામાં ભારે વરસાદની શક્યતા છે.

9 ઓગસ્ટના રોજ: વાવ-થરાદ, બનાસકાંઠા, સાબરકાંઠા અને અરવલ્લી જિલ્લામાં ગાજવીજ સાથે ભારે વરસાદની આગાહી.

માછીમારોને દરિયામાં ન જવાની સલાહ

ભારે વરસાદની આગાહી અને દરિયામાં પવનની ગતિ વધવાની શક્યતાને ધ્યાનમાં રાખીને, હવામાન વિભાગે માછીમારોને આગામી બે દિવસ દરિયામાં ન જવાની સલાહ આપી છે. દરિયાકાંઠાના વિસ્તારોમાં રહેતા લોકોને પણ સાવચેત રહેવાની અપીલ કરવામાં આવી છે. હવામાન વિભાગના ડેટા અનુસાર, અત્યાર સુધીમાં ગુજરાત પ્રદેશમાં સામાન્ય કરતાં 31 ટકા વધુ વરસાદ પડ્યો છે. બીજી તરફ, કચ્છ-સૌરાષ્ટ્ર પ્રદેશમાં હજુ પણ 15 ટકા વરસાદની ખાધ નોંધાઈ રહી છે, જેના કારણે આ વિસ્તારમાં સારા વરસાદની અપેક્ષા છે.