ઈરાન પરના હુમલામાં અમેરિકાએ અત્યાર સુધીમાં કેટલો ખર્ચ કર્યો ? ચોંકાવનારા આંકડા સામે આવ્યા

ઈરાન, અમેરિકા અને ઈઝરાયલ વચ્ચે 15 દિવસથી વધુ સમયથી યુદ્ધ ચાલી રહ્યું છે. ઈરાને હોર્મુઝ સ્ટ્રેટ પર નાકાબંધી લાદીને વૈશ્વિક સ્તરે ખળભળાટ મચાવ્યો છે. આ દરમિયાન, અમેરિકા, ઈઝરાયલ સાથે મળીને, બી-52 બોમ્બરનો ઉપયોગ કરીને તેહરાનથી ઈસ્ફહાન સુધી ઈરાન પર બોમ્બમારો કરી રહ્યું છે. ટ્રમ્પના બોમ્બ ઈરાની લશ્કરી થાણાઓને નષ્ટ કરી રહ્યા છે, જ્યારે ઈરાન પણ મિસાઈલ અને ડ્રોનથી આવા જ હુમલા કરી રહ્યું છે. આ દરમિયાન, હવે સમાચાર સામે આવ્યા છે કે અમેરિકાએ ઈરાન પરના હુમલાઓ પર અત્યાર સુધી કેટલો ખર્ચ કર્યો છે.

અત્યાર સુધી કેટલો ખર્ચ થયો છે?

ઈરાન સાથે ચાલી રહેલા યુદ્ધ વચ્ચે, યુએસ નેશનલ ઈકોનોમિક કાઉન્સિલના ડિરેક્ટર કેવિન હેસેટે રવિવારે મહત્વપૂર્ણ માહિતી શેર કરી. તેમણે જણાવ્યું હતું કે અમેરિકાએ ઈરાન સાથેના યુદ્ધ પર આશરે 12 બિલિયન યુએસ ડોલર ખર્ચ્યા છે. “મેં જે નવીનતમ આંકડા જોયા છે તે 12 બિલિયન ડોલર છે,” નેશનલ ઈકોનોમિક કાઉન્સિલના ડિરેક્ટર કેવિન હેસેટે સીબીએસ ન્યૂઝ પ્રોગ્રામમાં જણાવ્યું હતું.

શું વધુ ભંડોળની જરૂર પડશે?

યુએસ નેશનલ ઈકોનોમિક કાઉન્સિલના ડિરેક્ટર કેવિન હેસેટને પૂછવામાં આવ્યું હતું કે શું અમેરિકાને કોંગ્રેસ પાસેથી વધુ ભંડોળની વિનંતી કરવાની જરૂર પડશે. જવાબમાં, હેસેટે કહ્યું, “મારું માનવું છે કે હાલમાં આપણી પાસે જે જોઈએ છે તે બધું જ છે. શું આપણે વધુ પૈસા માટે કોંગ્રેસ પાસે પાછા જવું પડશે? આ એક એવો મામલો છે જેની રસેલ વોટ અને OMB તપાસ કરશે.” OMB એ યુએસ ઓફિસ ઓફ મેનેજમેન્ટ એન્ડ બજેટ છે, જેના ડિરેક્ટર રસેલ વોટ છે.