વડાપ્રધાન નરેન્દ્ર મોદીએ મહિલા દિવસના અવસર પર એલપીજી સિલિન્ડરની કિંમતમાં 100 રૂપિયાનો ઘટાડો કરવાની જાહેરાત કરી છે. લોકસભા ચૂંટણી પહેલા સરકારે લીધેલા આ નિર્ણયથી દેશના કરોડો પરિવારોને ફાયદો થશે. શુક્રવારે સવારે પીએમ મોદીએ ટ્વીટ કર્યું, ‘આજે મહિલા દિવસ પર, અમારી સરકારે એલપીજી સિલિન્ડરની કિંમતોમાં 100 રૂપિયાનો ઘટાડો કરવાનો નિર્ણય લીધો છે. તેનાથી નારી શક્તિનું જીવન સરળ બનશે એટલું જ નહીં પરંતુ કરોડો પરિવારોનો આર્થિક બોજ પણ ઓછો થશે. આ પગલું પર્યાવરણ સંરક્ષણમાં પણ મદદરૂપ થશે, જેનાથી સમગ્ર પરિવારના સ્વાસ્થ્યમાં પણ સુધારો થશે.
હવે સિલિન્ડરની કિંમત કેટલી થશે?
હાલમાં નવી દિલ્હીમાં 14.2 કિલોના ઘરેલુ એલપીજી સિલિન્ડરની કિંમત 903 રૂપિયા છે. હવે સરકારે તેમાં 100 રૂપિયાનો ઘટાડો કર્યો છે. આ પછી સિલિન્ડરની કિંમત ઘટીને 803 રૂપિયા થઈ જશે. જ્યાં ઉજ્જવલા યોજનાના લાભાર્થીઓને 300 રૂપિયાની સબસિડી મળશે, તેઓને આ સિલિન્ડર 603 રૂપિયામાં મળશે. નિયમો મુજબ, સરકાર એક વર્ષમાં LPG સિલિન્ડરના 12 રિફિલ માટે પાત્ર લાભાર્થીઓને રૂ. 300 ચૂકવે છે.
યોજના માર્ચ 2025 સુધી ચાલુ રહેશે
આ પહેલા ગુરુવારે સાંજે કેબિનેટની બેઠકમાં ઉજ્જવલા યોજના પર 300 રૂપિયાની સબસિડી એક વર્ષ માટે લંબાવવાનો નિર્ણય લેવામાં આવ્યો હતો. હવે આ સબસિડી 31 માર્ચ 2025 સુધી ચાલુ રહેશે. આ અંતર્ગત, ઉજ્જવલા યોજનાની મહિલા લાભાર્થીઓને વાર્ષિક 12 સિલિન્ડર મળશે. યોજનાને એક વર્ષ માટે લંબાવવાની જાહેરાત કરતા કેન્દ્રીય મંત્રી પીયૂષ ગોયલે કહ્યું કે કેબિનેટે પીએમ ઉજ્જવલા યોજનાના ગ્રાહકોને 31 માર્ચ, 2025 સુધી 300 રૂપિયાની સબસિડી ચાલુ રાખવાની મંજૂરી આપી છે. તેના પર કુલ 12,000 કરોડ રૂપિયાનો ખર્ચ થશે.
