બાબા રામદેવની કંપની પતંજલિ આયુર્વેદ લિમિટેડ પોતાનો નોન-ફૂડ બિઝનેસ વેચવાની તૈયારી કરી રહી છે. જેમાં ટૂથપેસ્ટ, તેલ, સાબુ અને શેમ્પૂનો બિઝનેસ સામેલ છે. બાબા રામદેવની પોતાની લિસ્ટેડ કંપની પતંજલિ ફૂડ્સ લિમિટેડને તેને ખરીદવાનો પ્રસ્તાવ આપવામાં આવ્યો છે. શેરબજારને આપેલી માહિતીમાં કંપનીએ કહ્યું કે તેને પતંજલિ આયુર્વેદ લિમિટેડના નોન-ફૂડ બિઝનેસના વેચાણ અંગેનો પત્ર મળ્યો છે.
કંપનીના બોર્ડે 26 એપ્રિલે આ પ્રસ્તાવ પર ચર્ચા કરી હતી. પતંજલિ આયુર્વેદની સ્થાપના બાબા રામદેવે કરી હતી. તે કંપનીના પ્રમોટર છે જ્યારે આચાર્ય બાલકૃષ્ણ તેના એમડી છે. પ્રમોટર ગ્રૂપના કુલ બિઝનેસમાં નોન-ફૂડ બિઝનેસનો હિસ્સો 50 ટકાથી વધુ છે. પતંજલિ ફૂડ્સ લિમિટેડનું કહેવું છે કે તેણે આ પ્રસ્તાવના મૂલ્યાંકન માટે સૈદ્ધાંતિક મંજૂરી આપી દીધી છે.
ખાદ્ય તેલ ઉત્પાદક કંપની પતંજલિ ફૂડ્સ લિમિટેડ અગાઉ રૂચી સોયા ઇન્ડસ્ટ્રીઝ તરીકે જાણીતી હતી. વર્ષ 2019માં બાબા રામદેવની કંપની પતંજલિ આયુર્વેદે તેને નાદારીની પ્રક્રિયામાં 4,350 કરોડ રૂપિયામાં ખરીદી હતી. જૂન 2022 માં કંપનીનું નામ બદલીને પતંજલિ ફૂડ્સ લિમિટેડ કરવામાં આવ્યું હતું. મે 2021માં, આ કંપનીએ પતંજલિ બિસ્કિટ પ્રાઇવેટ લિમિટેડને રૂ. 60.03 કરોડમાં ખરીદી હતી. આ પછી જૂન 2021 માં, તેણે પતંજલિ આયુર્વેદના નૂડલ્સ અને નાસ્તાના અનાજનો વ્યવસાય 3.50 કરોડ રૂપિયામાં ખરીદ્યો. મે 2022માં પતંજલિ ફૂડ્સે પતંજલિ આયુર્વેદ લિમિટેડનો ફૂડ બિઝનેસ રૂ. 690 કરોડમાં ખરીદ્યો હતો.
પતંજલિ ફૂડ્સે એક નિયમનકારી ફાઇલિંગમાં જણાવ્યું હતું કે પતંજલિ આયુર્વેદની દરખાસ્ત કંપનીના પ્રોડક્ટ પોર્ટફોલિયો સાથે મેળ ખાય છે અને કંપનીની આવક અને EBITDA વૃદ્ધિમાં મહત્વપૂર્ણ ભૂમિકા ભજવી શકે છે. પતંજલિ ફૂડ્સ લિમિટેડ દેશની ટોચની FMCG કંપનીઓમાં સામેલ છે. ખાદ્ય તેલ ઉપરાંત, કંપનીનો બિઝનેસ ફૂડ એન્ડ એફએમસીજી અને વિન્ડ જનરેશન સેગમેન્ટમાં પણ વિસ્તરેલો છે. તેના પોર્ટફોલિયોમાં પતંજલિ, રૂચી ગોલ્ડ અને ન્યુટેલા જેવી બ્રાન્ડનો સમાવેશ થાય છે. પતંજલિ આયુર્વેદ તાજેતરમાં જ સમાચારોમાં હતું. સુપ્રીમ કોર્ટે ભ્રામક જાહેરાતો માટે બાબા રામદેવ અને બાલકૃષ્ણને ફટકાર લગાવી હતી. આ માટે બંનેએ જાહેરમાં માફી પણ માંગી હતી.
