અરબ સાગરમાં લો પ્રેશર સર્જાતા આ વિસ્તારોમાં ભારે પવન સાથે વરસાદની આગાહી

દેશમાં એક તરફ જ્યાં આકરી ગરમી તબાહી મચાવી રહી છે. લોકો પરેશાન છે. ગરમીના કારણે બેહોશ થવાની સંખ્યા પણ વધી રહી છે. બીજી તરફ, બંગાળની ખાડીમાં તાજેતરમાં બનેલા ચક્રવાત રામલએ પશ્ચિમ બંગાળ અને બાંગ્લાદેશના દરિયાકાંઠાના વિસ્તારોમાં તબાહી મચાવી હતી. દરમિયાન 135 કિમી પ્રતિ કલાકની ઝડપે પવન ફૂંકાયો હતો અને 4 કલાક સુધી દરિયામાં લેન્ડફોલ થયો હતો. ચક્રવાતી તોફાનના કારણે બાંગ્લાદેશમાં 10 અને બંગાળમાં 6 લોકોના મોત થયા છે. હવે અરબી સમુદ્રમાં પણ લો પ્રેશર સર્જાયું છે જે ગુજરાતના આ વિસ્તારો માટે ચેતવણીનું કારણ બની રહ્યું છે.

અરબી સમુદ્રમાં લો પ્રેશર
અરબી સમુદ્રમાં લો પ્રેશર સર્જાવાને કારણે ગુજરાતના હવામાનને પણ અસર થઈ રહી છે. રાજ્યના હવામાન વિભાગે અરબી સમુદ્રના કિનારે આવેલા જિલ્લાઓ માટે એલર્ટ જાહેર કર્યું છે. માછીમારોને દરિયામાં ન જવાની સલાહ આપવામાં આવી છે. માછીમારોને પણ તેમની બોટ નજીકના બંદરો પર લાંગરવાની સલાહ આપવામાં આવી છે. રાજ્યના હવામાન વિભાગે દરિયાકાંઠાના વિસ્તારોમાં 70 થી 80 કિમી પ્રતિ કલાકની ઝડપે પવન ફૂંકાવાની આગાહી કરી છે. વલસાડના 70 કિલોમીટરના 34 ગામોને એલર્ટ કરાયા છે.

દક્ષિણ ગુજરાતના વલસાડના તિથલ બીચ પર સ્થાનિક વહીવટી તંત્ર દ્વારા પવન ફૂંકાવાની શક્યતાને ધ્યાનમાં રાખીને ચેતવણીનું બોર્ડ પણ મુકવામાં આવ્યું છે. વલસાડ જિલ્લાના વહીવટી તંત્રએ માછીમારોને 2 જૂન સુધી દરિયો ન ખેડવાની સૂચના આપી છે.

ગરમીનો પારો ઘટશે…
પવનની દિશા બદલાતા હીટ વેવની અસર ઓછી થઈ રહી છે. અમદાવાદમાં છેલ્લા 3 દિવસમાં મહત્તમ તાપમાનમાં ઘટાડો થયો છે. હવામાન વિભાગના જણાવ્યા અનુસાર આગામી પાંચ દિવસ સુધી ગરમીનો પારો પણ ઘટશે. જોકે બાફારાનું પ્રમાણ યથાવત રહેવાની આગાહી છે. આગામી પાંચ દિવસમાં અમદાવાદના તાપમાનમાં 1 થી 2 ડિગ્રીનો ઘટાડો થવાની સંભાવના છે. ગુરુવારે સુરેન્દ્રનગરમાં સૌથી વધુ 43.7 ડિગ્રી તાપમાન નોંધાયું હતું. આ સિવાય 6 શહેરોમાં તાપમાન 40થી ઉપર નોંધાયું હતું.

ધૂળના તોફાનની આગાહી
હવામાન વિભાગે રાજ્યમાં કચ્છ, પાટણ, બનાસકાંઠામાં પણ ધૂળની ડમરીઓ આવવાની આગાહી કરી છે. રાજ્યભરમાં ભારે પવન ફૂંકાશે. રાજ્યના તાપમાનની વાત કરીએ તો હવામાન વિભાગની તાજેતરની આગાહી મુજબ આગામી 7 દિવસ સુધી તાપમાન યથાવત રહેશે. અમદાવાદ અને ગાંધીનગરમાં તાપમાનનો પારો 43 થી 44 ડિગ્રીની આસપાસ રહી શકે છે. 4 જૂન સુધી વધુ ફેરફાર જોવા નહીં મળે. હવામાન વિભાગે આગાહી કરી છે કે ગુજરાતમાં 15 જૂનની આસપાસ ચોમાસું બેસવાની શક્યતા છે.