ઈન્ટરનેશનલ ક્રિકેટ કાઉન્સિલ (ICC) એ T-20 વર્લ્ડ કપ 2024 માટે $11.25 મિલિયન (લગભગ 93 કરોડ 51 લાખ રૂપિયા)ની રેકોર્ડ ઈનામી રકમની જાહેરાત કરી છે. વિજેતાને $2.45 મિલિયન (આશરે રૂ. 20 કરોડ 36 લાખ) અને ઉપવિજેતાને $1.28 મિલિયન આપવામાં આવશે. સેમી ફાઇનલમાં હારનાર ટીમોને $787,500 મળશે. ગત વખતે કુલ ઈનામી રકમ 5.6 મિલિયન ડોલર હતી, જેમાંથી વિજેતા ઈંગ્લેન્ડને 1.6 મિલિયન ડોલર મળ્યા હતા.
ICCએ એક નિવેદનમાં કહ્યું, “ICC મેન્સ T20 વર્લ્ડ કપની નવમી સિઝનમાં 20 ટીમોની ટૂર્નામેન્ટના વિજેતાને $2.45 મિલિયનની ઈનામી રકમ મળશે, જે ટૂર્નામેન્ટના ઈતિહાસમાં સૌથી વધુ ઈનામી રકમ છે. આ ઉપરાંત 29 જૂને બાર્બાડોસમાં ફાઇનલ પછી ટ્રોફી પણ આપવામાં આવશે. સુપર એટથી આગળ ન વધી શકનારી ચાર ટીમોમાંથી દરેકને $382,500 આપવામાં આવશે, જ્યારે નવમાથી 12માં સ્થાનની ટીમોને $247,500 આપવામાં આવશે અને 13માથી 20મા સ્થાન સુધીની ટીમોને $247,500 આપવામાં આવશે.
ICCએ કહ્યું, “દરેક મેચ જીતવા બદલ દરેક ટીમને $31,154 મળશે (સેમી ફાઈનલ અને ફાઈનલ સિવાય) 55 મેચની ટૂર્નામેન્ટ યુનાઈટેડ સ્ટેટ્સ અને વેસ્ટ ઈન્ડિઝના નવ સ્થળો પર 28 દિવસ સુધી રમાશે. આમાં પ્રથમ વખત 20 ટીમો ભાગ લઈ રહી છે. પ્રથમ રાઉન્ડની 40 મેચો બાદ ટોચની આઠ ટીમો સુપર આઠમાં પ્રવેશ કરશે. તેમાંથી ચાર ટીમ સેમિફાઇનલ રમશે. આ ટુર્નામેન્ટ વેસ્ટ ઈન્ડિઝ અને અમેરિકા દ્વારા સંયુક્ત રીતે રમાઈ રહી છે. અત્યાર સુધીમાં બે મેચનું આયોજન કરવામાં આવ્યું છે.
અમેરિકાએ ઓપનિંગ મેચમાં કેનેડાને સાત વિકેટે હરાવ્યું હતું. પ્રથમ બેટિંગ કરતા કેનેડાએ 5 વિકેટે 194 રન બનાવ્યા હતા. એરોન જોન્સની 40 બોલમાં 94 રનની અણનમ ઇનિંગની મદદથી અમેરિકાએ 14 બોલ બાકી રહેતા ટાર્ગેટ હાંસલ કરી લીધો હતો. વેસ્ટ ઈન્ડિઝે ટૂર્નામેન્ટની બીજી મેચમાં પાપુઆ ન્યૂ ગિની (PNG)ને પાંચ વિકેટે હરાવ્યું. વેસ્ટ ઈન્ડિઝને જીતવા માટે સંઘર્ષ કરવો પડ્યો હતો. વેસ્ટ ઈન્ડિઝે 137 રનના ટાર્ગેટનો પીછો કરીને 19 ઓવરમાં પાંચ વિકેટ ગુમાવીને જીત મેળવી હતી.
