ગુજરાતમાં ગરમીની સાથે સાથે ઠંડીનો ચમકારો પણ જોવા મળી રહ્યો છે. બધા લોકોના મનમાં એક વાત છે કે હવે વરસાદ પડે તો સારું. ત્યારે ગુજરાતીઓ માટે સારા સમાચાર છે. ચોમાસુ ગુજરાત તરફ આગળ વધી રહ્યું છે. ચોમાસુ મહારાષ્ટ્ર પહોંચી ગયું છે. સામાન્ય રીતે મહારાષ્ટ્રમાં ચોમાસાની શરૂઆતની તારીખ 10મી જૂન હોય છે. પરંતુ ચોમાસુ સામાન્ય તારીખ કરતા ચાર દિવસ વહેલું બેસી ગયું છે. ત્યારે ગુજરાતમાં પણ સામાન્ય રીતે 15મી જૂને ચોમાસું બેસી જાય છે. પરંતુ આ વખતે 15 જૂન પહેલા ચોમાસું બેસી જશે તેવી આગાહી કરવામાં આવી રહી છે.
ગુજરાત વરસાદની રાહ જોઈ રહ્યું છે. વરસાદ પડશે તો કાળઝાળ ગરમીમાંથી રાહત મળશે. ત્યારે હવામાન વિભાગે આગામી 7 દિવસની આગાહી કરી છે. જેમાં તેમણે માહિતી આપી છે કે ગુજરાતમાં સાત દિવસ સુધી સામાન્યથી મધ્યમ વરસાદની આગાહી કરવામાં આવી છે. ગુજરાતમાં સાયક્લોનિક સરક્યુલેશન સક્રિય થયું છે. જેના કારણે ગુજરાતમાં પ્રિ-મોન્સુન એક્ટિવિટી થશે. સાથોસાથ થંડર સ્ટોર્મ એક્ટિવિટી પણ થશે. આથી ગાજવીજ અને ભારે પવન સાથે હળવાથી મધ્યમ વરસાદની શક્યતા છે. જો કે, હવામાન વિભાગની આગાહી છે કે ગુજરાતમાં પણ સામાન્ય તારીખ પહેલા ચોમાસું બેસી જશે.
હવામાન વિભાગના જણાવ્યા અનુસાર આજે દાહોદ, છોટાઉદેપુર, ડાંગ, તાપી, નવસારી, વલસાડ, દમણ, દાદરા નગર હવેલીમાં વાવાઝોડાની ગતિવિધિ રહેશે. એટલે કે 30 થી 40 કિમી પ્રતિ કલાકની ઝડપે પવન સાથે સામાન્ય વરસાદની આગાહી કરવામાં આવી છે.
આ સાથે 8મી જૂને પંચમહાલ, દાહોદ, છોટા ઉદેપુર, નર્મદા, ડાંગ, તાપી, નવસારી, વલસાડ, દમણ, દાદરા નગર હવેલીમાં વાવાઝોડાની ગતિવિધિ થશે. એટલે કે 30 થી 40 કિમી પ્રતિ કલાકની ઝડપે પવન સાથે સામાન્ય વરસાદની આગાહી કરવામાં આવી છે.
