વાહન ચાલકો માટે મહત્વના સમાચાર છે. રોડ ટ્રાન્સપોર્ટ અને હાઈવે મંત્રાલયે મંગળવારે કહ્યું કે જો તમે માન્ય મોટર થર્ડ પાર્ટી ઈન્સ્યોરન્સ વગર વાહન ચલાવો છો તો તે સજાપાત્ર ગુનો છે. જો આમ કરતા જોવા મળે તો ત્રણ મહિનાની જેલ અથવા 2000 રૂપિયાનો દંડ થઈ શકે છે.
થર્ડ પાર્ટી ઈન્સ્યોરન્સ વિના વાહન ચલાવવું ગુનો છે
મોટર વાહન અધિનિયમ 1988ની કલમ 146 મુજબ, દેશના રસ્તાઓ પર ચાલતા મોટર વાહનો માટે તૃતીય પક્ષના જોખમોને આવરી લેતી વીમા પૉલિસી હોવી ફરજિયાત છે. કાનૂની જરૂરિયાત હોવા ઉપરાંત, મોટર તૃતીય પક્ષ વીમા કવર હોવું એ એક જવાબદાર માર્ગ વપરાશકર્તા બનવાનું એક મહત્વપૂર્ણ પાસું છે કારણ કે તે અકસ્માતો અથવા નુકસાનના કિસ્સામાં પીડિતોને સહાય પૂરી પાડે છે.
તમને જણાવી દઈએ કે જે લોકો માન્ય મોટર થર્ડ પાર્ટી ઈન્સ્યોરન્સ વિના વાહન ચલાવે છે અથવા અન્ય કોઈને વાહન ચલાવવા માટે આપે છે, તેમને કાયદાનો ભંગ કરવા બદલ ભારે દંડ થઈ શકે છે. આ સાથે તેને જેલ પણ થઈ શકે છે.
થર્ડ પાર્ટી ઈન્સ્યોરન્સ વિના ડ્રાઇવિંગ માટે આટલો દંડ
પ્રથમ ગુનો: ત્રણ મહિના સુધીની કેદ અથવા રૂ. 2000નો દંડ અથવા બંને
એક સજા પછી બીજો ગુનો: ત્રણ મહિના સુધીની કેદ અથવા રૂ. 4,000 સુધીનો દંડ અથવા બંને
થર્ડ પાર્ટી ઈન્સ્યોરન્સ સ્થિતિ તપાસો
લોકોને સલાહ આપતા માર્ગ પરિવહન અને રાજમાર્ગ મંત્રાલયે કહ્યું કે વાહન માલિકોએ તેમની સંબંધિત મોટર થર્ડ પાર્ટી વીમાની સ્થિતિ તપાસવી જોઈએ અને શક્ય તેટલી વહેલી તકે તેને પૂર્ણ અથવા નવીકરણ કરાવવું જોઈએ. માન્ય મોટર થર્ડ પાર્ટી વીમા કવચ વિના ચાલતા વાહનો પર અમલીકરણ અધિકારીઓ દ્વારા ઉપરોક્ત દંડની જોગવાઈ લાદવામાં આવશે.
