ભારતીય ક્રિકેટ ટીમના કેપ્ટન રોહિત શર્માએ સ્પષ્ટ કર્યું છે કે તે હજુ સુધી વનડે ક્રિકેટમાંથી નિવૃત્તિ લઈ રહ્યો નથી. ૧૦ મહિનામાં ભારતને બીજી વખત આઈસીસી ટાઇટલ ટ્રોફી અપાવ્યા બાદ તેમણે આ વિશે ખુલ્લેઆમ વાત કરી. રોહિત શર્મા હવે સૌરવ ગાંગુલી અને એમએસ ધોની પછી ચેમ્પિયન્સ ટ્રોફી જીતનાર ત્રીજો ભારતીય કેપ્ટન બની ગયો છે.
૩૭ વર્ષીય કેપ્ટન ભલે ગ્રુપ સ્ટેજ અને સેમિફાઇનલમાં સારું પ્રદર્શન ન કરી શક્યો હોય, પરંતુ તેણે ફાઇનલમાં શાનદાર અડધી સદી ફટકારીને મેચનો માર્ગ બદલી નાખ્યો.
દુબઈ ઈન્ટરનેશનલ ક્રિકેટ સ્ટેડિયમમાં ન્યુઝીલેન્ડ સામે રમાયેલી ચેમ્પિયન્સ ટ્રોફીની ફાઇનલમાં રોહિત શર્માએ 83 બોલમાં 76 રન બનાવ્યા હતા. આ ઇનિંગ ત્યારે આવી જ્યારે ભારતને તેની સૌથી વધુ જરૂર હતી. ટીમ ઈન્ડિયા સામે પ્રથમ બેટિંગ કરતા, ન્યુઝીલેન્ડે ધીમી પીચ પર 7 વિકેટે 251 રન બનાવ્યા. રોહિતની ઇનિંગથી ટીમ ઇન્ડિયાને 49 ઓવરમાં 252 રનનો લક્ષ્યાંક પ્રાપ્ત કરવામાં મદદ મળી અને મેન ઓફ ધ મેચનો એવોર્ડ મળ્યો.
ભૂતપૂર્વ ભારતીય ક્રિકેટર યોગરાજ સિંહે રોહિતના આ નિર્ણયની પ્રશંસા કરી છે. તેમણે કહ્યું કે તેઓ ઇચ્છે છે કે રોહિત અને વિરાટ કોહલી બંને 2027 વર્લ્ડ કપ સુધી ODI ક્રિકેટ રમતા રહે. યોગરાજે ANI ને કહ્યું, “સૌથી સારી વાત એ છે કે રોહિત શર્માએ કહ્યું કે તે નિવૃત્તિ લઈ રહ્યો નથી. શાબાશ, મારા દીકરા.
રોહિત અને વિરાટને કોઈ નિવૃત્તિ કરાવી શકતું નથી. તેણે 2027નો ODI વર્લ્ડ કપ જીત્યા પછી જ નિવૃત્તિ વિશે વિચારવું જોઈએ. મેં પહેલેથી જ કહ્યું હતું કે ભારત જીતશે.”
આગામી ODI વર્લ્ડ કપ સુધીમાં, રોહિત 40 વર્ષનો થઈ જશે અને કોહલી 39 વર્ષનો થઈ જશે. જોકે, રોહિત હાલમાં ખૂબ આગળ વિચારી રહ્યો નથી અને તેની રમત અને માનસિકતા પર ધ્યાન કેન્દ્રિત કરી રહ્યો છે. રોહિતે JioHotstar પર કહ્યું, “અત્યારે, હું વસ્તુઓ જેમ આવે છે તેમ લઈ રહ્યો છું.
મારા માટે બહુ આગળ વિચારવાનો કોઈ અર્થ નથી. અત્યારે, મારું ધ્યાન સારું રમવા અને યોગ્ય માનસિકતા જાળવવા પર છે. હું કોઈ રેખા દોરીને કહેવા માંગતો નથી કે હું 2027નો વર્લ્ડ કપ રમીશ કે નહીં. અત્યારે આવા નિવેદનો આપવાનો કોઈ અર્થ નથી.”
