હવામાન વિભાગે આગામી 7 દિવસ રાજ્યમાં વરસાદની આગાહી કરી છે. વિભાગના નિષ્ણાત રામાશ્રય યાદવે જણાવ્યું હતું કે આગામી 24 કલાક રાજ્યમાં ભારેથી અતિ ભારે વરસાદની શક્યતા છે. એક સાથે 2 સિસ્ટમ સક્રિય થવાને કારણે વરસાદી વાતાવરણ સર્જાયું છે. દક્ષિણ ગુજરાતથી બંગાળ સુધી એક ટ્રફ સક્રિય થયો છે અને ઉત્તર પૂર્વ રાજસ્થાન પર ચક્રવાતી પરિભ્રમણ સક્રિય થયું છે. માછીમારોને આગામી 5 દિવસ સુધી દરિયામાં ન જવાની સલાહ આપવામાં આવે છે. પવનની ગતિ 40 થી 50 કિમી રહેશે. અમદાવાદ અને ગાંધીનગરમાં ભારે વરસાદ અને ઓરેન્જ એલર્ટ જારી કરવામાં આવ્યું છે. બનાસકાંઠા અને સાબરકાંઠામાં અતિ ભારે વરસાદની આગાહી સાથે રેડ એલર્ટ છે.
નક્ષત્રો અનુસાર આગાહી કરતા અંબાલાલ પટેલે જણાવ્યું હતું કે 22 જૂને સવારે સૂર્ય આદ્રા નક્ષત્રમાં પ્રવેશ કરશે. આદ્રા નક્ષત્રનું પાણી ખેતી માટે સારું માનવામાં આવે છે. ૨૧, ૨૨, ૨૩ જૂનના રોજ રાજ્યના ઘણા ભાગોમાં વરસાદ પડવાની શક્યતા છે. આદ્રા નક્ષત્રના અસ્ત પછી ૨-૩ દિવસમાં ભારેથી અતિ ભારે વરસાદ પડવાની શક્યતા છે. ૨૪ થી ૩૦ જૂન દરમિયાન રાજ્યમાં ભારે વરસાદની આગાહી છે. તેથી, નીચાણવાળા વિસ્તારમાં સાવચેતી રાખવાની જરૂર છે.
અમદાવાદ, ગાંધીનગરમાં ભારે વરસાદ પડશે. આ ઉપરાંત, મહેસાણાના કેટલાક ભાગોમાં ભારેથી અતિ ભારે વરસાદ પડવાની શક્યતા છે. તો સાબરકાંઠા, પંચમહાલમાં છૂટાછવાયા ભારે વરસાદ પડવાની શક્યતા છે. મહિસાગરના કેટલાક ભાગો અને પૂર્વ ગુજરાતના કેટલાક ભાગોમાં ભારે વરસાદ પડવાની આગાહી છે. દક્ષિણ ગુજરાતના કેટલાક ભાગોમાં પણ ભારે વરસાદ પડવાની આગાહી છે.
