વડોદરામાં પુલ દુર્ઘટના બાદ ગુજરાત સરકાર એક્શન મોડમાં આવી ગઈ છે. સીએમ ભૂપેન્દ્ર પટેલે અકસ્માતની વિગતવાર અને સંપૂર્ણ ઉચ્ચ સ્તરીય તપાસના આદેશ આપ્યા હતા. આની જવાબદારી નિષ્ણાતોની એક ટીમને સોંપવામાં આવી હતી, જેમણે સમારકામ, નિરીક્ષણ અને ગુણવત્તા ચકાસણી અંગેનો અહેવાલ સુપરત કરવાનો હતો.
પ્રાથમિક તપાસ બાદ, નિષ્ણાત સમિતિએ 5 ઇજનેરોની જવાબદારી નક્કી કરી. આ બાબતની નોંધ લેતા, પાંચેય ઇજનેરોને તાત્કાલિક અસરથી સસ્પેન્ડ કરવામાં આવ્યા છે. તેમના નામ એનએમ નાયકવાલા (એક્ઝિક્યુટિવ એન્જિનિયર), યુસી પટેલ (ડેપ્યુટી એક્ઝિક્યુટિવ એન્જિનિયર), આરટી પટેલ (ડેપ્યુટી એક્ઝિક્યુટિવ એન્જિનિયર) અને જેવી શાહ (સહાયક એન્જિનિયર) છે.
મૃત્યુઆંક વધીને 16 થયો
તે જ સમયે, સીએમ ભૂપેન્દ્ર પટેલે રાજ્યના અન્ય પુલોનું તાત્કાલિક અને સંપૂર્ણ નિરીક્ષણ કરવા પણ સૂચનાઓ આપી છે. મહિસાગર નદી પર ગંભીરા પુલ તૂટી પડવાની ઘટનામાં મૃત્યુઆંક વધીને 16 થઈ ગયો છે, જ્યારે ઓછામાં ઓછા ત્રણ લોકો હજુ પણ ગુમ છે. ગુરુવારે વધુ ચાર મૃતદેહ મળી આવ્યા હતા.
આણંદ અને વડોદરા શહેરોને જોડતા ચાર દાયકા જૂના આ પુલનો એક ભાગ બુધવારે સવારે નદીમાં તૂટી પડ્યો. ત્યાંથી પસાર થતા ઘણા વાહનો નદીમાં પડી ગયા. વડોદરાના કલેક્ટર અનિલ ધામેલિયાના જણાવ્યા અનુસાર, ‘એનડીઆરએફ અને એસડીઆરએફની ટીમો નદીમાં ચાર કિલોમીટર અંદર સુધી વ્યાપક શોધ કામગીરી ચલાવી રહી છે. અત્યાર સુધીમાં 16 મૃતદેહ મળી આવ્યા છે જ્યારે ત્રણ લોકો હજુ પણ ગુમ છે. લોકો અન્ય કોઈ ગુમ થયેલી વ્યક્તિની જાણ કરવા માટે અમારા કંટ્રોલ રૂમ પર ફોન કરી શકે છે.
બુધવારે મોડી રાત્રે ત્રણ મૃતદેહ મળી આવ્યા હતા
તેમણે કહ્યું કે નદીમાં પડી ગયેલી કાર અને મીની ટ્રક વિશે કોઈ ચોક્કસ માહિતી ઉપલબ્ધ નથી, તેથી આ દુર્ઘટનાનો ભોગ વધુ કેટલાક લોકો બન્યા હોઈ શકે છે. આ વાહનો ત્રણ મીટર સુધી કાદવમાં દટાયેલા છે. વહીવટીતંત્રના જણાવ્યા અનુસાર, મૃતકોમાં આણંદ જિલ્લાના આઠ, વડોદરાના ચાર, ભરૂચના બે અને દેવભૂમિ દ્વારકા અને પંચમહાલના એક-એક વ્યક્તિનો સમાવેશ થાય છે. બુધવારે મોડી રાત્રે નદીમાં પડી ગયેલી ટાઇલ્સ ભરેલી ટ્રકને દૂર કરવામાં આવી અને શોધખોળ હાથ ધરવામાં આવી, જેમાં ત્રણ મૃતદેહ મળી આવ્યા.
કલેક્ટરે કહ્યું, ‘વરસાદ અને નદીમાં કાદવના જાડા સ્તરને કારણે, બચાવ કામગીરી અત્યંત પડકારજનક બની ગઈ છે કારણ કે આવી સ્થિતિમાં કોઈ મશીન કામ કરી રહ્યું નથી. નદીની વચ્ચે ડૂબી ગયેલા વાહનોની નજીક જવા માટે કિનારે એક ખાસ પુલ બનાવવામાં આવી રહ્યો છે. દરમિયાન, ગુરુવારે માર્ગ અને મકાન વિભાગના વરિષ્ઠ અધિકારીઓની એક ટીમે ઉચ્ચ સ્તરીય તપાસ કરવા માટે સ્થળની મુલાકાત લીધી હતી.
