ગુજરાત પર માવઠાનું સંકટ! એકસાથે 3 સિસ્ટમ સક્રિય..વાતાવરણમાં પલટો આવવાની શક્યતા

ગુજરાતના લોકો હાલમાં વિચિત્ર હવામાનનો અનુભવ કરી રહ્યા છે. રાજ્ય હાલમાં ‘બેવડી ઋતુ’નો અનુભવ કરી રહ્યું છે, જેમાં સવારે ઠંડી અને બપોરે તડકો છે. આ દરમિયાન, ભારતીય હવામાન વિભાગ (IMD) તરફથી એક મહત્વપૂર્ણ આગાહી બહાર આવી છે. આગામી દિવસોમાં દેશમાં એક પછી એક કુલ 3 વેસ્ટર્ન ડિસ્ટર્બન્સ સક્રિય થવાની આશંકા છે. આની સીધી અસર ગુજરાતના હવામાન પર પડી શકે છે. ખાસ કરીને 20 જાન્યુઆરી પછી, હવામાનમાં ફેરફાર થવાની સંભાવના છે, જેના કારણે ઉત્તર ગુજરાત, કચ્છ અને સૌરાષ્ટ્રના કેટલાક વિસ્તારોમાં કમોસમી વરસાદ અથવા બરફ પડવાના સંકેતો છે.

ઉત્તર ભારતમાં હિમવર્ષા, ગુજરાતમાં ઠંડી

હવામાન વિભાગ (IMD) અનુસાર, આગામી એક અઠવાડિયા દરમિયાન ઉત્તર ભારતમાં ત્રણ વેસ્ટર્ન ડિસ્ટર્બન્સ સક્રિય થશે. જેના કારણે જમ્મુ-કાશ્મીર, હિમાચલ પ્રદેશ અને ઉત્તરાખંડના પશ્ચિમી હિમાલય ક્ષેત્રમાં ભારે વરસાદ અને હિમવર્ષા થવાની સંભાવના છે. પર્વતો પર આ હિમવર્ષાની અસર મેદાની વિસ્તારોમાં પણ અનુભવાશે. ઠંડા ઉત્તર-પશ્ચિમ પવનો ફૂંકાતા ગુજરાતમાં પણ ઠંડી વધશે. જોકે, હાલ રાજ્યમાં કોઈ મોટા વાવાઝોડા કે ભારે વરસાદની શક્યતા નથી, પરંતુ વાદળછાયું વાતાવરણ અને છૂટાછવાયા વરસાદ ખેડૂતોની ચિંતા વધારી શકે છે.

તાપમાનના આંકડા અને આરોગ્ય ચેતવણી

હાલના તાપમાનની વાત કરીએ તો, આગામી દિવસોમાં લઘુત્તમ તાપમાન ૧૪ થી ૧૫ ડિગ્રી અને મહત્તમ તાપમાન ૩૦ થી ૩૨ ડિગ્રીની આસપાસ રહેવાની ધારણા છે. ઠંડી, ગરમી અને સંભવિત વરસાદના આ મિશ્ર વાતાવરણને કારણે લોકોમાં વાયરલ ચેપના કેસોમાં વધારો થવાની શક્યતા છે, તેથી નાગરિકોને તેમના સ્વાસ્થ્યનું ધ્યાન રાખવાની સલાહ આપવામાં આવે છે.

નલિયામાં જીવલેણ ઠંડી

બીજી તરફ, રાજ્યમાં ઠંડીનો પ્રકોપ ચાલુ છે. કચ્છનું નલિયા આજે ૧૦.૮ ડિગ્રી તાપમાન સાથે રાજ્યનું સૌથી ઠંડુ શહેર નોંધાયું હતું. આ ઉપરાંત, સૌરાષ્ટ્ર-કચ્છના અન્ય શહેરોમાં પણ તાપમાનમાં ઘટાડો થયો છે. ઉત્તર ગુજરાતના પોરબંદરમાં લઘુત્તમ તાપમાન ૧૧ ડિગ્રી, અમરેલીમાં ૧૧.૬ ડિગ્રી અને ડીસામાં ૧૧.૯ ડિગ્રી નોંધાયું હતું. આમ, આગામી સપ્તાહ ગુજરાતના હવામાન માટે ખૂબ જ અસ્થિર રહેવાની શક્યતા છે.