વરસાદને લઈને અંબાલાલની નવી આગાહી: બંગાળની ખાડીમાં સિસ્ટમ સક્રિય થતાં ગુજરાતમાં તૂટી પડશે વરસાદ

હવામાન નિષ્ણાત અંબાલાલ પટેલની નવી આગાહી મુજબ, રાજ્યમાં ચાલી રહેલી વરસાદી ઋતુ વચ્ચે આગામી દિવસોને લઈને મહત્વપૂર્ણ સમાચાર પ્રકાશમાં આવ્યા છે. રાજ્યમાં વરસાદની તીવ્રતા હવે ધીમે ધીમે ઓછી થઈ રહી છે, પરંતુ 28 જુલાઈથી ઓગસ્ટની શરૂઆત સુધી ગુજરાતમાં ફરી એકવાર ભારે વરસાદ પડવાની પ્રબળ શક્યતાઓ વ્યક્ત કરવામાં આવી છે.

રાજ્યમાં વરસાદની તીવ્રતા ઓછી થશે, પરંતુ વરસાદ ચાલુ રહેશે
હવામાન નિષ્ણાત અંબાલાલ પટેલના જણાવ્યા મુજબ, 28 જુલાઈએ ગુજરાતથી ઉત્તર તરફ હાલની વરસાદી સિસ્ટમ ખસી જવાથી રાજ્યમાં વરસાદની તીવ્રતામાં નોંધપાત્ર ઘટાડો થશે. જોકે, તે પહેલાં, ઉત્તર ગુજરાતમાં બનાસકાંઠા, મહેસાણા, અરવલ્લી અને સાબરકાંઠાના કેટલાક ભાગોમાં પવન સાથે વરસાદ પડી શકે છે. આ ઉપરાંત, મધ્ય ગુજરાત, કચ્છ, ઉત્તર સૌરાષ્ટ્ર, દક્ષિણ ગુજરાત અને સૌરાષ્ટ્રના અન્ય ભાગોમાં પણ હળવાથી ભારે વરસાદ ચાલુ રહેવાની શક્યતા છે.

બંગાળની ખાડીમાં સિસ્ટમ સક્રિય, 28 થી 30 જુલાઈ દરમિયાન નવી આફત:

બંગાળની ખાડીમાં હાલમાં એક નવી લો-પ્રેશર સિસ્ટમ આકાર લઈ રહી છે. આ સિસ્ટમ મધ્યપ્રદેશના કેટલાક ભાગોમાંથી થઈને ગુજરાત તરફ આગળ વધશે, જેના કારણે રાજ્યમાં ફરી એકવાર ભારે વરસાદનો નવો રાઉન્ડ શરૂ થશે. 28 થી 30 જુલાઈ દરમિયાન ગુજરાતના વિવિધ ભાગોમાં ભારે વરસાદ થવાની સંભાવના છે.

ઓગસ્ટ મહિનામાં અણધાર્યો વરસાદ અને નવો રાઉન્ડ:

અંબાલાલ પટેલની આગાહી મુજબ, ઓગસ્ટની શરૂઆત સુધીમાં રાજ્યમાં અણધાર્યો વરસાદ પડી શકે છે. ઓગસ્ટની શરૂઆતથી 12 ઓગસ્ટ સુધી, દક્ષિણ ગુજરાતના કેટલાક ભાગોમાં ભારેથી અતિ ભારે વરસાદની સંભાવના છે, જેના કારણે તાપી નદીનું પાણીનું સ્તર નોંધપાત્ર રીતે વધી શકે છે. ત્યારબાદ, ઓગસ્ટના ત્રીજા અઠવાડિયામાં એટલે કે 9 અને 10 ઓગસ્ટ દરમિયાન રાજ્યમાં વરસાદનો નવો રાઉન્ડ આવી શકે છે.

ગુજરાતના 9 જિલ્લાઓમાં આજે રેડ એલર્ટ
રેડ એલર્ટ (9 જિલ્લા): બનાસકાંઠા, વાવ-થરાદ, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા અને સુરેન્દ્રનગર.
ઓરેન્જ એલર્ટ (૧૮ જિલ્લાઓ): અમદાવાદ, આણંદ, પંચમહાલ, દાહોદ, મહિસાગર, વડોદરા, છોટા ઉદેપુર, નર્મદા, ભરૂચ, સુરત, નવસારી, વલસાડ, રાજકોટ, અમરેલી, ભાવનગર, મોરબી, બોટાદ અને કચ્છ.

સરદાર સરોવર નર્મદા ડેમની વર્તમાન સ્થિતિ: નર્મદા ડેમમાં પાણી સતત વહેતું રહે છે. આજે સવારે ૯:૦૦ વાગ્યા સુધીમાં:

વર્તમાન પાણીનું સ્તર: ૧૨૮.૩૮ મીટર (મહત્તમ સ્તર: ૧૩૮.૬૮ મીટર)
સંગ્રહ: ૬૯.૨૫% (૬૫૫૦.૮૧ MCM)
પાણીનો પ્રવાહ: ૨૬૩ ક્યુસેક
કુલ જાવક: ૨૪૦૫ ક્યુસેક (નદીમાં ૬૨૦ ક્યુસેક અને નહેરમાં ૧૭૮૫ ક્યુસેક)
છેલ્લા ૨૪ કલાકમાં ડેમનું સ્તર ૧૧ સેન્ટિમીટર વધ્યું છે.