સોનાનો ભાવ હાલમાં રેકોર્ડ સ્તરે ચાલી રહ્યો છે. છેલ્લા કેટલાક દિવસોથી આ કીમતી ધાતુના ભાવમાં જબરદસ્ત વધારો જોવા મળી રહ્યો છે. 11 માર્ચે સોનું 65646 રૂપિયા પ્રતિ 10 ગ્રામના ઓલ ટાઈમ હાઈ પર પહોંચ્યા બાદ હવે તેમાં થોડો ઘટાડો જોવા મળી રહ્યો છે. જો કે, આ તફાવત માત્ર રૂ. 100 જેટલો છે, જે રેકોર્ડ સ્તરને ધ્યાનમાં લેતા નજીવો છે. સપ્તાહના છેલ્લા ટ્રેડિંગ દિવસે MCXની સાથે બુલિયન માર્કેટમાં પણ તેજી જોવા મળી રહી છે. ચાંદી રૂ.74000ને પાર પહોંચી ગઈ હતી.
ચાંદીમાં 350 રૂપિયાની આસપાસનો વધારો થયો છે
શુક્રવારે બુલિયન માર્કેટમાં સોનાની કિંમતમાં માત્ર 11 રૂપિયાનો વધારો થયો હતો.ગુરુવારે સાંજે 65523 રૂપિયા પર બંધ થયેલા 24 કેરેટ સોનું 65534 રૂપિયા પ્રતિ 10 ગ્રામ પર પહોંચી ગયું હતું. બીજી તરફ ચાંદીના ભાવમાં આશરે રૂ. 350નો ઉછાળો આવ્યો હતો અને 74125 રૂ. પ્રતિ કિલોના સ્તરે જોવા મળ્યો હતો. એમસીએક્સ પર સોનું રૂ. 240 વધી રૂ. 65835 અને ચાંદી રૂ. 434 વધી રૂ. 75660 પ્રતિ કિલોગ્રામ પર પહોંચી હતી.
15 દિવસમાં સોનું રૂ.3400 વધ્યું
માર્ચ મહિનાની શરૂઆત સાથે જ સોનાના ભાવમાં વધારો થયો છે. 1 માર્ચે સોનાનો ભાવ 62816 રૂપિયા પ્રતિ 10 ગ્રામ પર પહોંચી ગયો હતો. 11 માર્ચે આ દર 65646 રૂપિયા પર પહોંચી ગયો હતો. 29 ફેબ્રુઆરીએ તેની કિંમત 62241 રૂપિયા પ્રતિ 10 ગ્રામ હતી. આ રીતે 15 દિવસમાં સોનું 3400 રૂપિયા પ્રતિ 10 વધી ગયું છે. 7 માર્ચ સુધીમાં સોનાના ભાવમાં ઝડપથી વધારો થયો હતો અને તે 65049 રૂપિયા પ્રતિ 10 ગ્રામ પર પહોંચી ગયો હતો. જો કે, આ પછી આગામી આઠ દિવસમાં વૃદ્ધિની ગતિ ધીમી પડી હતી.
15 માર્ચે સોના અને ચાંદીના ભાવ
24 કેરેટ સોનું — રૂ 65534 પ્રતિ 10 ગ્રામ
23 કેરેટ સોનું — રૂ 65272 પ્રતિ 10 ગ્રામ
22 કેરેટ સોનું — રૂ 60029 પ્રતિ 10 ગ્રામ
18 કેરેટ સોનું — રૂ 49150 પ્રતિ 10 ગ્રામ
ચાંદીની કિંમત—74125 રૂપિયા પ્રતિ કિલો
સોનું કેમ વધી રહ્યું છે?
લગ્નસરાની સિઝન હાલમાં એક મહિનાથી ઠંડી પડી ગઈ છે. હવે એક મહિના પછી લગ્નની સિઝન શરૂ થશે. તાજેતરમાં લગ્નની સિઝનના કારણે સોનાના ભાવમાં પણ વધારો થયો હતો. નિષ્ણાતોનું કહેવું છે કે સોનાના ભાવમાં વધારો ફેડરલ રિઝર્વ તરફથી નાણાકીય નીતિમાં ફેરફારની અપેક્ષાને કારણે થયો છે. રશિયા અને યુક્રેન વચ્ચે ચાલી રહેલા યુદ્ધ અને ઈઝરાયેલ અને હમાસ વચ્ચે ચાલી રહેલા તણાવને કારણે ઘણા દેશોની સેન્ટ્રલ બેંકો સોનાની ખરીદી કરી રહી છે.
