ગુજરાતમાં ફરી મેઘરાજા ભુક્કા બોલાવશે! જાણો નવા વરસાદી રાઉન્ડને લઈને કઈ તારીખની અપાઈ લેટેસ્ટ આગાહી

હવામાન નિષ્ણાત અંબાલાલ પટેલે ગુજરાતના ખેડૂતો અને લોકો માટે સારા સમાચાર આપ્યા છે. ઓગસ્ટની શરૂઆતમાં વરસાદ પડવાનું મુખ્ય કારણ પ્રશાંત મહાસાગરમાં ઉભરેલું ચક્રવાત હતું. આ ચક્રવાત અરબી સમુદ્ર અને બંગાળની ખાડીમાંથી બધો ભેજ પોતાની તરફ ખેંચી રહ્યો હતો, જેના કારણે આપણા દેશમાં સારો વરસાદ થવામાં મોટો અવરોધ હતો. પરંતુ હવે રાહતના સમાચાર એ છે કે આ ચક્રવાત દક્ષિણ ચીન તરફ વળી ગયું છે. તેથી, બંગાળની ખાડીમાં ફરી એક નવી સિસ્ટમ બનવાની સંભાવના છે અને 13 ઓગસ્ટ સુધીમાં ગુજરાતમાં ફરી એકવાર સારો વરસાદ જોવા મળશે.

અંબાલાલ પટેલની આગાહી મુજબ, આજથી જ રાજ્યના ઘણા વિસ્તારોમાં મેઘરાજાનો મહેર શરૂ થવાની સંભાવના છે. 13 ઓગસ્ટ સુધીમાં મહિસાગર, પંચમહાલ, દાહોદ, છોટા ઉદેપુર, વડોદરા, અમદાવાદ, ગાંધીનગર, સાબરકાંઠા, અરવલ્લી અને બનાસકાંઠા તેમજ દક્ષિણ ગુજરાત અને સૌરાષ્ટ્રના વિસ્તારોમાં વરસાદ પડી શકે છે. એટલું જ નહીં, પાટણ, સમી અને હારિજના કેટલાક ભાગોમાં પણ વરસાદી વાતાવરણ રહેશે. નોંધનીય છે કે આ સમયગાળા દરમિયાન સાબરકાંઠા અને અરવલ્લી જિલ્લામાં સૌથી વધુ વરસાદ પડવાની શક્યતા છે.

જો આપણે ૧૪ ઓગસ્ટ પછીના હવામાન પર નજર કરીએ તો, બંગાળની ખાડીમાં એક નવું ‘લો પ્રેશર’ બનશે. જોકે, તેની મહત્તમ અસર પૂર્વ ભારતના રાજ્યોમાં જોવા મળશે. પરંતુ આપણા ગુજરાતમાં, ૧૭, ૧૮ અને ૧૯ ઓગસ્ટે હવામાન ફરી બદલાશે અને કેટલાક વિસ્તારોમાં વરસાદ પડશે. તે પછી, ૨૨ અને ૨૩ ઓગસ્ટે, સમગ્ર ગુજરાત, સૌરાષ્ટ્ર અને દક્ષિણ ગુજરાતમાં વરસાદી ઝાપટા પડવાની આગાહી કરવામાં આવી છે.

મહિનાના અંતમાં, એટલે કે ૩૧ ઓગસ્ટે, ‘પૂર્વ ફાલ્ગુની નક્ષત્ર’ અસ્ત થશે, જેના કારણે વરસાદની પણ શક્યતા છે. જોકે, અંબાલાલ પટેલ કહે છે કે આ નક્ષત્રમાં પડી રહેલા વરસાદનું પાણી એટલું સારું માનવામાં આવતું નથી. આ પછી, મેઘરાજા સપ્ટેમ્બર મહિનામાં પણ વિરામ લેવાના મૂડમાં નથી. ૨ અને ૭ સપ્ટેમ્બરના રોજ હવામાનમાં બીજો મોટો ફેરફાર થશે. એકંદરે, સમગ્ર સપ્ટેમ્બર મહિનો રાજ્યના વિવિધ ભાગોમાં ભારે વરસાદ પડવાની પ્રબળ શક્યતા છે.