દેશના મોટા ક્રિકેટરોની વાત કરવામાં આવે તો સચિન તેંડુલકર, વિરાટ કોહલી અને મહેન્દ્ર સિંહ ધોનીનું નામ સૌથી પહેલા આવે છે. આ દિગ્ગજોએ માત્ર ક્રિકેટના મેદાન પર જ પોતાની છાપ છોડી નથી, પરંતુ જાહેરાત, વ્યવસાય અને તેમની શાનદાર કારકિર્દી દ્વારા પણ મોટી કમાણી કરી છે. જો કે એક એવો ક્રિકેટર છે જેની સંપત્તિ આ દિગ્ગજો કરતા પણ વધુ છે. આ ક્રિકેટરનું નામ છે આર્યમન વિક્રમ બિરલા.
9 જુલાઈ 1997ના રોજ મુંબઈ મહારાષ્ટ્રમાં જન્મેલા આર્યમન વિક્રમ બિરલા માત્ર એક ક્રિકેટર જ નહીં પરંતુ એક સફળ બિઝનેસમેન પણ છે. તેઓ દિગ્ગજ ઉદ્યોગપતિ આદિત્ય બિરલા ગ્રુપના ચેરમેન કુમાર મંગલમ બિરલાના પુત્ર છે. આર્યમનની નેટવર્થ આશરે રૂ. 70,000 કરોડ હોવાનો અંદાજ છે, જે તેને ક્રિકેટના દિગ્ગજ સચિન તેંડુલકર, વિરાટ કોહલી અને મહેન્દ્ર સિંહ ધોની કરતાં વધુ સમૃદ્ધ બનાવે છે.
આર્યમનની ક્રિકેટ કારકિર્દી વિશે વાત કરીએ તો તેણે રણજી ટ્રોફીની 2017-18 સીઝન દરમિયાન મધ્યપ્રદેશ માટે રમવાનું શરૂ કર્યું. તેની નવ ફર્સ્ટ-ક્લાસ ક્રિકેટ મેચોમાં તેણે 414 રન બનાવ્યા, જેમાં 2 સદી અને એક અડધી સદીનો સમાવેશ થાય છે. તેના શાનદાર પ્રદર્શનને જોઈને આ ક્રિકેટરને 2018ની ઈન્ડિયન પ્રીમિયર લીગ (આઈપીએલ)ની હરાજીમાં રાજસ્થાન રોયલ્સે 30 લાખ રૂપિયામાં ખરીદ્યો હતો. શાનદાર ક્રિકેટ કારકિર્દી હોવા છતાં આર્યમને અંગત કારણોસર વર્ષ 2019માં ક્રિકેટમાંથી બ્રેક લીધો હતો.
આર્યમને બિઝનેસની દુનિયામાં પણ મોટી સફળતા હાંસલ કરી છે. તે અને તેની બહેન અનન્યા બિરલાને વર્ષ 2023માં આદિત્ય બિરલા જૂથની મુખ્ય કંપની ગ્રાસિમ ઇન્ડસ્ટ્રીઝના બોર્ડમાં સામેલ કરવામાં આવી હતી. આર્યમન આદિત્ય બિરલા ગ્રૂપની કેટલીક કંપનીઓમાં ડિરેક્ટરશિપ પણ ધરાવે છે.
આર્યમનની અંદાજિત સંપત્તિ 70,000 કરોડ રૂપિયા છે. આ ભારતના કેટલાક પ્રખ્યાત ક્રિકેટરો કરતાં વધુ છે. ક્રિકેટના ભગવાન તરીકે ઓળખાતા સચિન તેંડુલકરની કુલ સંપત્તિ અંદાજે 1,100 કરોડ રૂપિયા છે. તે જ સમયે વિરાટ કોહલીની કુલ સંપત્તિ લગભગ 900 કરોડ રૂપિયા છે. તેવી જ રીતે ભારતીય ક્રિકેટ ટીમના પૂર્વ કેપ્ટન એમએસ ધોનીની કુલ સંપત્તિ 800 કરોડ રૂપિયાની આસપાસ છે. આર્યમન વિશે એમ કહી શકાય કે તે સચિન તેંડુલકર, વિરાટ કોહલી અને મહેન્દ્ર સિંહ ધોની કરતાં પણ વધુ સંપત્તિનો માલિક છે.
