ઘણા વાહન માલિકો વારંવાર તેમના ફાસ્ટેગ વોલેટને રિચાર્જ કરવાનું ભૂલી જાય છે. જેના કારણે તેમને ડબલ ટોલ ચૂકવવો પડે છે. પરંતુ, હવે આવું નહીં થાય. પરંતુ, હવે ભારતીય રિઝર્વ બેંક દ્વારા તેમની સમસ્યાનું નિરાકરણ કરવામાં આવ્યું છે. ફાસ્ટેગ બેલેન્સ નિર્ધારિત મર્યાદા કરતાં ઓછું થતાં જ ગ્રાહકના બેંક ખાતામાંથી વોલેટમાં પૈસા આપોઆપ ટ્રાન્સફર થઈ જશે. રિઝર્વ બેંક ઓફ ઈન્ડિયાના ઈ-મેન્ડેટ માળખામાં ફાસ્ટેગ અને NCMCના સમાવેશથી આ શક્ય બન્યું છે. રિઝર્વ બેંક ઓફ ઈન્ડિયાએ ગુરુવારે આ બંનેને ઈ-મેન્ડેટ ફ્રેમવર્કમાં સામેલ કરવાની જાહેરાત કરી હતી. આનો અર્થ એ થયો કે હવે ફાસ્ટેગ અને નેશનલ કોમન મોબિલિટી કાર્ડ યુઝર્સને આ બંને પેમેન્ટ ઇન્સ્ટ્રુમેન્ટમાં વારંવાર પૈસા જમા કરાવવાની ઝંઝટમાંથી મુક્તિ મળશે.
આરબીઆઈએ તેની પ્રેસ રિલીઝમાં કહ્યું છે કે ફાસ્ટેગ અને એનસીએમસી હેઠળ ચુકવણી માટે કોઈ નિશ્ચિત સમય નથી. કોઈપણ સમયે ચુકવણીની જરૂર પડી શકે છે, તેથી કોઈ ચોક્કસ સમય મર્યાદા વિના ખાતામાં નાણાં જમા કરવામાં આવશે. જ્યારે આ પેમેન્ટ ઇન્સ્ટ્રુમેન્ટ્સમાં બેલેન્સ નિર્ધારિત મર્યાદાથી નીચે આવે છે, ત્યારે ગ્રાહકના ખાતામાંથી પૈસા આપોઆપ કપાઈ જશે અને આ વોલેટ્સમાં ઉમેરવામાં આવશે. આ માટે યુઝરને મેન્યુઅલી વારંવાર પૈસા ઉમેરવાની જરૂર નહીં પડે.
ઈ-મેન્ડેટ ફ્રેમવર્ક શું છે?
ઇ-મેન્ડેટ ફ્રેમવર્ક જે 2019 માં શરૂ થતા પરિપત્રોની શ્રેણી દ્વારા સ્થાપિત કરવામાં આવ્યું હતું, તે ગ્રાહકોને તેમના ખાતામાં આવતા ડેબિટ વિશે સૂચિત કરીને તેમને સુરક્ષિત કરવા માટે ડિઝાઇન કરવામાં આવ્યું હતું. ઈ-મેન્ડેટ ફ્રેમવર્ક હેઠળ, ગ્રાહકના ખાતામાંથી પૈસા ઉપાડવાના ઓછામાં ઓછા 24 કલાક પહેલા નોટિસ આપવી જરૂરી છે.
હાલમાં, ‘ઈ-મેન્ડેટ’ હેઠળ એટલે કે ચુકવણી માટે ઈલેક્ટ્રોનિક મંજૂરી, દૈનિક, સાપ્તાહિક, માસિક વગેરે જેવી નિશ્ચિત અવધિ સાથેની સુવિધાઓ માટે નિશ્ચિત સમયે ગ્રાહકના ખાતામાંથી ચુકવણી આપમેળે થઈ જાય છે. આ મિકેનિઝમ માટે, વપરાશકર્તાએ ઇ-મેન્ડેટ દ્વારા એકવાર પૈસા ડેબિટ કરવાની પરવાનગી આપવી પડશે.
