ગુજરાતમાં હજુ વરસાદની બેટિંગ ચાલુ રહેશે! બંગાળની ખાડીમાં સિસ્ટમ સક્રિય, 25 સપ્ટેમ્બર સુધી છે આગાહી

ગુજરાત હવામાન વિભાગની આગાહી મુજબ, રાજ્યમાંથી ચોમાસું પાછું ખેંચાવાનું શરૂ થઈ ગયું છે. જોકે, બંગાળની ખાડીમાં સક્રિય હવામાન પ્રણાલીને કારણે દેશના અનેક રાજ્યોમાં વરસાદી માહોલ જોવા મળી રહ્યો છે. વિભાગે આજે, ૨૨ સપ્ટેમ્બરે ગુજરાતમાં હળવા વરસાદની આગાહી કરી છે, જ્યારે આવતીકાલથી વરસાદની તીવ્રતા ઘટવાની શક્યતા છે.

ભારતીય હવામાન વિભાગ (IMD) અનુસાર, રાજસ્થાન, હરિયાણા અને પંજાબમાંથી ચોમાસું પાછું ખેંચાઈ રહ્યું છે. સાથે જ, આગામી દિવસોમાં સૌરાષ્ટ્ર અને કચ્છના કેટલાક વિસ્તારોમાંથી પણ ચોમાસું પાછું ખેંચાવા માટે અનુકૂળ પરિસ્થિતિ સર્જાઈ રહી છે; પરિણામે, ૨૩ સપ્ટેમ્બર પછી વરસાદની શક્યતા ઘટી જશે.

આજે ગુજરાતમાં વરસાદી વાતાવરણ રહેવાની શક્યતા છે, જોકે ૨૩ સપ્ટેમ્બરથી વરસાદની તીવ્રતા ઘટી શકે છે. તેમ છતાં, અમદાવાદ સહિતના વિસ્તારોમાં ૨૫ સપ્ટેમ્બર સુધી વરસાદી માહોલ યથાવત રહી શકે છે.

હવામાન વિભાગની આગાહી મુજબ, અમદાવાદમાંથી ચોમાસું હજુ સંપૂર્ણપણે પાછું ખેંચાયું નથી. અમદાવાદ જિલ્લામાં ૨૫ તારીખ સુધી છૂટોછવાયો વરસાદ પડી શકે છે અને આજે પણ રાજ્યના ઘણા જિલ્લાઓમાં વરસાદની શક્યતા છે.

બંગાળની ખાડીમાં સક્રિય લો-પ્રેશર સિસ્ટમ (હવાનું હળવું દબાણ) વધુ તીવ્ર બની રહી છે અને બુધવાર સુધીમાં તે ઉત્તર આંધ્રપ્રદેશ અને દક્ષિણ ઓડિશાના કિનારે પહોંચે તેવી શક્યતા છે, જેનાથી વરસાદ પડી શકે છે. માછીમારોને દરિયામાં ન જવાની સલાહ આપવામાં આવી છે.