ગુજરાતની સાબરમતી જેલમાં બંધ ગેંગસ્ટર લોરેન્સ બિશ્નોઈને લઈને ક્ષત્રિય કરણી સેનાના પ્રમુખ રાજ શેખાવતે ફરી એકવાર મોટી જાહેરાત કરી છે. તેણે કહ્યું છે કે ‘પોલીસને બદલે જો કોઈ કેદી લોરેન્સ બિશ્નોઈની હત્યા કરશે તો તેને 1,11,11,111 રૂપિયા ઈનામની રકમ પણ મળશે.’
રાજ શેખાવતે કહ્યું, “મેં જે 1,11,11,111 રૂપિયાનું ઈનામ જાહેર કર્યું છે તે લોરેન્સ બિશ્નોઈના એન્કાઉન્ટર પર પોલીસકર્મીને ચોક્કસપણે આપવામાં આવશે. આ સાથે હું બીજી જાહેરાત કરું છું કે, જો સાબરમતી જેલમાં બંધ કોઈપણ કેદી લોરેન્સ બિશ્નોઈને પતાવી નાખે છે તો તેને ક્ષત્રિય કરણી સેના તરફથી 1,11,11,111 રૂપિયાની ઈનામની રકમ પણ આપવામાં આવશે.”
કરણી સેના પોલીસકર્મીના પરિવારની સંભાળ લેશે – શેખાવત
ક્ષત્રિય કરણી સેનાના વડા રાજ શેખાવતે તાજેતરમાં જાહેરાત કરી હતી કે જો કોઈ પોલીસકર્મી લોરેન્સ બિશ્નોઈનો સામનો કરશે તો તેમની સંસ્થા તેને 1,11,11,111 રૂપિયાનું ઈનામ આપશે. તેમણે એમ પણ કહ્યું છે કે ક્ષત્રિય કરણી સેના તે પોલીસકર્મીના પરિવારની સંપૂર્ણ કાળજી લેશે અને દરેક જરૂરિયાત પૂરી કરશે. તેમણે કહ્યું કે ક્ષત્રિય કરણી સેના સાથે કરોડો લોકો જોડાયેલા છે. જો તેઓ 5 પૈસા પણ ફાળો આપે તો ઈનામની રકમની વ્યવસ્થા થઈ જશે.
સુખદેવસિંહ ગોગામેડીની પત્નીએ કર્યો નવો ખુલાસો
હવે ફરી એકવાર સુખદેવ સિંહ ગોગામેડીની પત્ની શીલા ગોગામેડીએ રાજ શેખાવતના નિવેદન પર વળતો પ્રહાર કર્યો છે. તેણીએ કહ્યું, “હું કહેવા માંગુ છું કે લોરેન્સ બિશ્નોઈનું નામ હજુ સુધી સુખદેવ સિંહ ગોગામેડી હત્યા કેસમાં સામે આવ્યું નથી.” તેમનું કહેવું છે કે NIA દ્વારા રજૂ કરવામાં આવેલી ચાર્જશીટમાં લોરેન્સ બિશ્નોઈનું નામ નથી. અગાઉ તેમણે કહ્યું હતું કે રાજ શેખાવતે જે પણ નિવેદનો આપ્યા છે, તે સસ્તી લોકપ્રિયતા માટે આપવામાં આવ્યા છે. તે ગૂંચવણમાં મૂકે છે.
