એક મહિલાએ ૩૦૦ લિટર સ્તન દૂધનું દાન કરીને બધાને આશ્ચર્યચકિત કર્યા છે. ૩૩ વર્ષીય મહિલા ગૃહિણી છે અને લગભગ બે વર્ષમાં ૩૦૦ લિટર દૂધનું દાન કરી છે. આ એક અનોખો અને ચોંકાવનારો કિસ્સો છે. બે બાળકોની માતા સેલ્વા બ્રિન્ધાએ એપ્રિલ ૨૦૨૩ થી ફેબ્રુઆરી ૨૦૨૫ સુધીના ૨૨ મહિનામાં મહાત્મા ગાંધી મેમોરિયલ સરકારી હોસ્પિટલ (MGMGH) ની મિલ્ક બેંકમાં કુલ ૩૦૦.૧૭ લિટર દૂધનું દાન કર્યું.
૨૨ મહિનામાં ૩૦૦ લિટર દૂધનું દાન કરનારી મહિલા
સેલ્વા બ્રિન્ધા તિરુચિરાપલ્લી જિલ્લાના કટ્ટુરની રહેવાસી છે. તેમણે ૨૨ મહિનાના સમયગાળામાં ૩૦૦.૧૭ લિટર સ્તન દૂધનું દાન કરીને હજારો બીમાર બાળકોના જીવ બચાવ્યા છે. આ પછી, સેલ્વા બ્રિન્ધાએ ભારતમાં રેકોર્ડ સ્તન દૂધ દાન કરવા બદલ ઇન્ડિયા બુક ઓફ રેકોર્ડ્સ અને એશિયા બુક ઓફ રેકોર્ડ્સ બંનેમાં સ્થાન મેળવ્યું.
સમાચાર એજન્સી ANI સાથે વાત કરતા, સેલ્વા બ્રિન્ધાએ કહ્યું, “મેં 300 લિટર સ્તન દૂધનું દાન કર્યું છે. ભારતમાં કોઈ વ્યક્તિ દ્વારા સૌથી વધુ માત્રામાં સ્તન દૂધ દાન કરવા બદલ મને ઇન્ડિયા બુક ઓફ રેકોર્ડ્સ અને એશિયા બુક ઓફ રેકોર્ડ્સમાં સ્થાન મળ્યું છે.”
સેલ્વા બ્રિન્ધાએ જણાવ્યું કે જ્યારે તેના બીજા બાળકનો જન્મ થયો ત્યારે તેને કમળો થયો હતો, જેના કારણે તેને 3 થી 4 દિવસ માટે NICU (નિયોનેટલ ઇન્ટેન્સિવ કેર યુનિટ) માં દાખલ કરવામાં આવ્યો હતો. તે સમયે તેણીને તેના સ્તનોમાંથી દૂધ કાઢીને બાળકને ખવડાવવાનું કહેવામાં આવ્યું હતું. પછી તેની પરવાનગીથી, વધારાનું દૂધ અન્ય NICU બાળકોને પણ આપવામાં આવ્યું.
સેલ્વાએ અન્ય મહિલાઓને પણ વિનંતી કરી છે કે બધી નવી માતાઓએ સ્તન દૂધનું દાન કરવું જોઈએ. તેમણે જણાવ્યું કે સ્વાસ્થ્ય સમસ્યાઓના કારણે ઘણા અકાળ બાળકોને NICU માં દાખલ કરવામાં આવે છે. આવા સમયે, સ્તન દૂધનું દાન મહત્વપૂર્ણ ભૂમિકા ભજવે છે. તેમણે સૌપ્રથમ અમૃતમ ફાઉન્ડેશનની મદદથી સ્તન દૂધનું દાન કરવાનું શરૂ કર્યું.
