દર વખતે અલગ અલગ કંપનીઓ રાજકીય પાર્ટીને ફંડ આપે છે. ત્યારે આ વખતે પણ કંપનીઓએ રૂપિયાનો વરસાદ કર્યો છે. હવે ચૂંટણી પંચે તેની વેબસાઈટ પર ઈલેક્ટોરલ બોન્ડ ખરીદતી ટોચની કંપનીઓની વિગતો અપલોડ કરી છે. આ વિગત બે ભાગમાં અપલોડ કરવામાં આવી છે. પ્રથમ ભાગમાં 337 પાના છે. આમાં ચૂંટણી બોન્ડ ખરીદતી કંપનીઓ અને સંસ્થાઓના નામ, ખરીદીની તારીખ અને રકમ વિશેની માહિતીનો સમાવેશ થાય છે. ચૂંટણી પંચે પોતાની વેબસાઈટ પર સ્ટેટ બેંક ઓફ ઈન્ડિયા (SBI) દ્વારા સુપ્રીમ કોર્ટમાં સબમિટ કરેલા ઈલેક્ટોરલ બોન્ડનો સંપૂર્ણ ડેટા અપલોડ કર્યો છે.
2018 માં સ્ટેટ બેંક ઓફ ઈન્ડિયા દ્વારા આ યોજના શરૂ કરવામાં આવી ત્યારથી 30 હપ્તાઓમાં રૂ. 16,518 કરોડના ઈલેક્ટોરલ બોન્ડની માહિતી જાહેર કરવામાં આવી છે. ભારતીય ચૂંટણી પંચની વેબસાઈટ પર અપલોડ કરાયેલા ડેટા અનુસાર જે રાજકીય પક્ષોને ભંડોળ પૂરું પાડે છે તેમાં ગેમિંગથી લઈને ઈન્ફ્રા અને માઈનિંગ સુધીની ઘણી કંપનીઓનો સમાવેશ થાય છે. ચાલો તમને જણાવીએ કે રાજકીય પક્ષોને ફંડ આપનારી આ કંપનીઓ શું કરે છે અને તેમણે રાજકીય પક્ષોને કેટલું ડોનેશન આપ્યું છે.
ભારતના ચૂંટણી પંચની વેબસાઈટ પર અપલોડ કરાયેલા ડેટા અનુસાર સૌથી વધુ દાન આપનારી કંપનીઓમાં ફ્યુચર ગેમિંગ એન્ડ હોટેલ સર્વિસિસનું નામ પ્રથમ સ્થાને છે. કંપનીએ 1368 કરોડ રૂપિયાનું ફંડ આપ્યું છે. એપ્રિલ 2019 થી જાન્યુઆરી 2024 સુધી ફ્યુચર ગેમિંગ અને હોટેલ સેવાઓ આ યાદીમાં ટોચ પર છે. બીજા ક્રમે મેઘા એન્જિનિયરિંગ એન્ડ ઈન્ફ્રાસ્ટ્રક્ચર લિમિટેડે રૂ. 966 કરોડનું ભંડોળ આપ્યું છે. આ પછી ક્વિક સપ્લાય ચેઈન પ્રાઈવેટ લિમિટેડ રૂ. 410 કરોડ, હલ્દિયા એનર્જી લિમિટેડે રૂ. 377 કરોડ, વેદાંત લિમિટેડ રૂ. 376 કરોડ, એસ્સેલ માઇનિંગ એન્ડ ઇન્ડસ્ટ્રીઝ લિમિટેડે રૂ. 225 કરોડ, વેસ્ટર્ન યુપી પાવર ટ્રાન્સમિશન કંપની લિમિટેડ રૂ. 220 કરોડ, ભારતી એરટેલ રૂ. 198 કરોડ, કેવેન્ટર ફૂડ પાર્ક ઇન્ફ્રા લિમિટેડે 195 કરોડ, એમકે એન્ટરપ્રાઇઝ લિમિટેડે 192 કરોડનું દાન આપ્યું છે.
ફ્યુચર ગેમિંગ એન્ડ હોટેલ સર્વિસ પ્રાઈવેટ લિમિટેડના બિઝનેસ વિશે વાત કરીએ તો લોટરી બિઝનેસમાં તેઓ કામ કરે છે. કંપનીના હેડક્વાર્ટરની સ્થાપના વર્ષ 1991માં કોઈમ્બતુરમાં કરવામાં આવી હતી. મેઘા એન્જિનિયરિંગ એન્ડ ઈન્ફ્રાસ્ટ્રક્ચર લિમિટેડ ડેમ અને પાવર પ્રોજેક્ટ્સમાં સામેલ છે. ક્વિક સપ્લાય ચેઇન પ્રાઇવેટ લિમિટેડ લોજિસ્ટિક્સ અને સપ્લાય ચેઇનના બિઝનેસમાં છે. હલ્દિયા એનર્જી લિમિટેડ પશ્ચિમ બંગાળમાં થર્મલ પાવર પ્લાન્ટ ધરાવે છે. વેદાંત લિમિટેડની વાત કરીએ તો તે દેશની સૌથી મોટી માઇનિંગ કંપની છે. આ કંપનીની સ્થાપના 25 જૂન 1965ના રોજ થઈ હતી. કંપનીનું મુખ્ય મથક મુંબઈ મહારાષ્ટ્રમાં છે.
