પશ્ચિમ બંગાળની શાળાઓમાં શિક્ષકો અને કર્મચારીઓની નિમણૂકમાં કથિત અનિયમિતતાઓને લઈને એન્ફોર્સમેન્ટ ડિરેક્ટોરેટે ટીએમસીના ધારાસભ્યના નિવાસસ્થાને દરોડા પાડ્યા હતા. અધિકારીઓના જણાવ્યા અનુસાર, દરોડાની જાણ થતાં જ સાહાએ તેમના ઘરની સીમા દિવાલ કૂદીને ભાગવાનો પ્રયાસ કર્યો હતો. જોકે, અધિકારીઓએ તેમની ધરપકડ કરી હતી.
“ધારાસભ્યને દરોડાની જાણ થતાં જ તેમણે પરિસરની સીમા દિવાલ કૂદીને ભાગવાનો પ્રયાસ કર્યો હતો. ધારાસભ્યનો પીછો કરવામાં આવ્યો હતો અને અમારા અધિકારીઓ અને કેન્દ્રીય દળોએ તેમને ખેતરમાં પકડી લીધા હતા. તેમનું શરીર કાદવથી ખરડાયેલું હતું,” ED અધિકારીએ પીટીઆઈને જણાવ્યું. અધિકારીએ એ પણ માહિતી આપી હતી કે ED તેમના PA ના નિવાસસ્થાને પણ દરોડા પાડી રહી છે.
ED અધિકારીઓએ તળાવમાંથી ફોન મેળવ્યા
ED અધિકારીએ જણાવ્યું કે પુરાવાનો નાશ કરવાના પ્રયાસમાં ધારાસભ્યએ પોતાનો ફોન ઘરની નજીકના તળાવમાં ફેંકી દીધો. તેમણે કહ્યું, “અમારા અધિકારીઓએ તળાવમાંથી બંને મોબાઇલ ફોન કબજે કર્યા છે. બંને ફોન ફોરેન્સિક તપાસ માટે મોકલવામાં આવશે. ધારાસભ્યની પૂછપરછ કરવામાં આવી રહી છે.” તેમણે કહ્યું કે કથિત ભરતી કૌભાંડના સંબંધમાં બીરભૂમ જિલ્લાના એક વ્યક્તિ દ્વારા પૈસાના વ્યવહારો અંગેની માહિતીના આધારે દરોડો પાડવામાં આવ્યો હતો.
સીબીઆઈ દ્વારા અગાઉ ધરપકડ
શિક્ષક ભરતી કૌભાંડ કેસમાં બુરવાનના ધારાસભ્ય સાહાની અગાઉ ધરપકડ કરવામાં આવી છે. સીબીઆઈ ટીમે 17 એપ્રિલ 2023 ના રોજ તેમની ધરપકડ કરી હતી. તેમને 2024 માં જામીન પર મુક્ત કરવામાં આવ્યા હતા. હાલમાં, તેઓ સુપ્રીમ કોર્ટના આદેશથી જામીન પર છે. સીબીઆઈ કેસના ગુનાહિત પાસાની તપાસ કરી રહી છે, જ્યારે ED મની લોન્ડરિંગ પાસા પર ધ્યાન કેન્દ્રિત કરી રહી છે.
આ પહેલા, ED એ પશ્ચિમ બંગાળના ભૂતપૂર્વ શિક્ષણ પ્રધાન પાર્થ ચેટર્જી, તેમના નજીકના સહાયક અર્પિતા મુખર્જી, ટીએમસી ધારાસભ્ય અને પશ્ચિમ બંગાળ પ્રાથમિક શિક્ષણ બોર્ડના ભૂતપૂર્વ અધ્યક્ષ માણિક ભટ્ટાચાર્ય અને કેટલાક અન્ય લોકોની આ જ કેસમાં ધરપકડ કરી હતી. ચેટર્જીની ધરપકડ પછી, ટીએમસીએ તેમને પાર્ટીમાંથી સસ્પેન્ડ કરી દીધા હતા. ED એ આ કેસમાં અત્યાર સુધીમાં ચાર ચાર્જશીટ દાખલ કરી છે.
