દેશમાં વધી રહેલી મોંઘવારીની અસર હવે રોજિંદા જીવનમાં વપરાતી વસ્તુઓ પર જોવા મળી રહી છે. પામતેલના ભાવમાં વધારાને કારણે સાબુના ભાવમાં વધારો થયો છે. રિપોર્ટ અનુસાર HUL અને વિપ્રો જેવી દૈનિક ઉપયોગની ચીજવસ્તુઓ બનાવતી મોટી કંપનીઓએ પામતેલના ભાવમાં વધારાની અસરને ઘટાડવા માટે સાબુના ભાવમાં લગભગ સાતથી આઠ ટકાનો વધારો કર્યો છે.
પામ તેલ સાબુ ઉત્પાદનો માટે મુખ્ય કાચો માલ છે. એચયુએલ અને ટાટા કન્ઝ્યુમર જેવી કંપનીઓએ પણ તાજેતરમાં ચાના ભાવમાં વધારો કર્યો છે કારણ કે અનિયમિત હવામાનને કારણે ઉત્પાદનમાં ઘટાડો થયો છે. સપ્ટેમ્બર ક્વાર્ટરના પરિણામો દરમિયાન, ઘણી લિસ્ટેડ કંપનીઓએ તેમના માર્જિનને બચાવવા માટે ચાલુ ક્વાર્ટરમાં સાબુના ભાવમાં વધારો સૂચવ્યો હતો. આ કંપનીઓ પામ ઓઈલ, કોફી અને કોકો જેવી કોમોડિટીના વધતા ખર્ચનો સામનો કરી રહી હતી.
7-8 ટકા ભાવ વધારો
એજન્સી સાથે વાત કરતાં વિપ્રો કન્ઝ્યુમર કેરના ચીફ એક્ઝિક્યુટિવ ઓફિસર (CEO) નીરજ ખત્રીએ જણાવ્યું હતું કે, “સાબુ બનાવવાના મુખ્ય કાચા માલના ભાવમાં નોંધપાત્ર વધારો થયો છે. આ વર્ષની શરૂઆતથી તેમાં 30 ટકાથી વધુનો વધારો થયો છે.
તેમણે કહ્યું કે પરિણામે તમામ મોટા વેપારીઓએ આંશિક રીતે વધારાને સરભર કરવા માટે કિંમતોમાં લગભગ સાત-આઠ ટકાનો વધારો કર્યો છે. અમારા ભાવ ગોઠવણો આ બજારના વલણો સાથે સુસંગત છે. અઝીમ પ્રેમજીની આગેવાની હેઠળની વિપ્રો એન્ટરપ્રાઇઝિસનું એકમ વિપ્રો સંતૂર જેવી બ્રાન્ડની માલિકી ધરાવે છે.
પામ ઓઈલના ભાવમાં 40 ટકા સુધીનો વધારો થયો છે
અગ્રણી કંપની હિન્દુસ્તાન યુનિલિવર લિમિટેડ (HUL)એ પણ ચા અને સ્કિન ક્લિનિંગ પ્રોડક્ટ્સના ભાવમાં વધારો કર્યો છે. તેમાં ડવ, લક્સ, લાઇફબૉય, લિરિલ, પિયર્સ, રેક્સોના વગેરે બ્રાન્ડ્સ હેઠળ તેના સાબુના વ્યવસાયનો સમાવેશ થાય છે.
આયાત ડ્યૂટીમાં વધારાની સાથે વૈશ્વિક ભાવમાં વધારાને કારણે સપ્ટેમ્બરના મધ્યથી પામ ઓઈલના ભાવમાં લગભગ 35-40 ટકાનો વધારો થયો છે. પામ ઓઈલ મુખ્યત્વે ઈન્ડોનેશિયા અને મલેશિયાથી આયાત કરવામાં આવે છે. હાલમાં પામ તેલનો ભાવ 10 કિલો દીઠ રૂ. 1,370ની આસપાસ છે.
