રાજ્યમાં વરસાદને લઈને હવામાન વિભાગે મોટી આગાહી કરી છે. આગામી 2 દિવસ રાજ્યના વિવિધ જિલ્લાઓમાં ભારે વરસાદની આગાહી છે. પરિસ્થિતિનો સામનો કરવા માટે, NDRF ની 12 ટીમો અને SDRF ની 20 ટીમો વિવિધ જિલ્લાઓમાં તૈનાત કરવામાં આવી છે.
રાહત નિયામકની અધ્યક્ષતામાં ગાંધીનગરમાં હવામાન દેખરેખ જૂથની બેઠક યોજાઈ હતી. આ બેઠકમાં, ભારતીય હવામાન વિભાગના એક અધિકારીએ આગામી અઠવાડિયા દરમિયાન ગુજરાતમાં વરસાદની પરિસ્થિતિ વિશે વિગતવાર માહિતી આપી હતી.
હવામાન વિભાગે આવતીકાલે 20 ઓગસ્ટના રોજ અમરેલી, ભાવનગર, સુરત, નવસારી અને વલસાડ જિલ્લામાં અને 21 ઓગસ્ટના રોજ કચ્છ, દેવભૂમિ દ્વારકા, પોરબંદર અને જૂનાગઢ જિલ્લામાં ભારે વરસાદની આગાહી કરી છે. આ ઉપરાંત, 25 ઓગસ્ટ સુધી સમગ્ર રાજ્યમાં મધ્યમથી ભારે વરસાદની આગાહી કરવામાં આવી છે.
બેઠકમાં હાજર NDRF અને SDRF અધિકારીઓના જણાવ્યા અનુસાર, ચોમાસા દરમિયાન ઊભી થતી કોઈપણ કટોકટીની પરિસ્થિતિને પહોંચી વળવા માટે NDRF ની કુલ 12 ટીમો અને SDRF ની 20 ટીમો વિવિધ જિલ્લાઓમાં તૈનાત કરવામાં આવી છે. આ ઉપરાંત, NDRF ની એક ટીમને રિઝર્વમાં રાખવામાં આવી છે. આ ઉપરાંત, રાહત નિયામક દ્વારા સુરેન્દ્રનગર જિલ્લામાં આયોજિત તરણેતર મેળા માટે SDRF ની એક ટીમ ફાળવવા સૂચના આપવામાં આવી હતી.
