ડોનાલ્ડ ટ્રમ્પની ટેરિફ નીતિ પછી, રોકાણકારો સોના તરફ વળ્યા છે. ચીન પર ૧૨૫% ટેરિફ વધારવાની જાહેરાત બાદ વૈશ્વિક સ્તરે વેપાર યુદ્ધનો ભય વધુ ઘેરો બન્યો છે.
આવી સ્થિતિમાં, રોકાણકારોએ સુરક્ષિત વિકલ્પની શોધમાં સોનાની ખરીદી વધારી દીધી છે, જેના કારણે 9 એપ્રિલે આંતરરાષ્ટ્રીય બજારમાં સોનાના ભાવમાં રેકોર્ડબ્રેક ઉછાળો નોંધાયો હતો. સોનાના ભાવમાં માત્ર એક જ દિવસમાં $100 થી વધુનો ઉછાળો જોવા મળ્યો, જેને અત્યાર સુધીનો સૌથી મોટો ઉછાળો માનવામાં આવે છે.
બુધવારે રાત્રે ગોલ્ડ USD 3 ટકાના વધારા સાથે ટ્રેડ કરી રહ્યો હતો અને હવે 1.25 ટકાના વધારા સાથે 3124 ના સ્તરે ટ્રેડ કરી રહ્યો છે.
આ ઉછાળા પાછળનું કારણ શું છે?
અમેરિકા દ્વારા ચીન પર કડક ટેરિફ લાદવા અને અન્ય દેશોને કામચલાઉ રાહત આપવાથી બજારમાં અનિશ્ચિતતાનું વાતાવરણ સર્જાયું છે. રોકાણકારો જોખમી સંપત્તિઓથી દૂર જઈ રહ્યા છે અને સોના જેવા સુરક્ષિત આશ્રયસ્થાનોમાં તેમનું રોકાણ વધારી રહ્યા છે. પરિણામે, આંતરરાષ્ટ્રીય બજારમાં હાજર સોનાનો ભાવ 0.2% વધીને $3,089.17 પ્રતિ ઔંસ થયો છે.
સ્થાનિક બજારમાં પણ સોનામાં મજબૂતી છે.
ભારતના ઘણા શહેરોમાં સોનાનો ભાવ પ્રતિ 10 ગ્રામ 90,400 રૂપિયાથી ઉપર પહોંચી ગયો છે. આ વધારો એવા સમયે થયો છે જ્યારે સોનાના ભાવ છેલ્લા પાંચ દિવસથી ઘટી રહ્યા છે.
શું ખરેખર સોનું ₹55,000 સુધી ઘટી જશે?
જોકે, હાલના વધારા વચ્ચે, કેટલાક વિશ્લેષકો આગામી વર્ષોમાં સોનામાં મોટા ઘટાડાની આગાહી કરી રહ્યા છે. અમેરિકા સ્થિત મોર્નિંગસ્ટાર વિશ્લેષક જોન મિલ્સ અનુસાર, પુરવઠામાં વધારો, માંગમાં ઘટાડો અને ઊંચા ભાવને કારણે સોનામાં 38% સુધીનો ઘટાડો થઈ શકે છે. આવી સ્થિતિમાં, ભારતમાં સોનાનો ભાવ પ્રતિ 10 ગ્રામ ₹ 55,000 સુધી ઘટી શકે છે.
